राजकारणात भाजपला मुलं झाली नाहीत, त्यांना मुले होत नाही त्यात माझी काही चूक? उद्धव ठाकरेंकडून खरपूस समाचार https://ift.tt/l0BGaSA

नवी मुंबई: स्वर्गीय आनंद दिघे यांचे 'गद्दारांना क्षमा नाही' हे वाक्य होते. त्यांनी गद्दारांना कधीच थारा दिला नाही. 'शिवसेनेचे ठाणे आणि ठाण्याची शिवसेना', असे समीकरण त्यांनी जुळवून ठेवले होते. मात्र आता याच ठाण्यात निर्माण झालेल्या गद्दारांना जनता क्षमा करणार नाही. ठाणे लोकसभा मतदारसंघाच्या निवडणुकीत गद्दारांना ठाणेकर गाडल्याशिवाय राहणार नाही. हे कृतीतून करून दाखवेल, असा विश्वास व्यक्त करत उद्धव ठाकरे यांनी मोदींच्या ४०० पारचा आणि मुख्यमंत्री एकनाथ शिंदे यांचा ऐरोली येथील प्रचारसभेत खरपूस समाचार घेतला. मतदरसंघाचे महाविकास (इंडिया)आघाडीचे २५ ठाणे लोकसभा मतदारसंघाचे उमेदवार राजन विचारे यांच्या प्रचारार्थ रविवारी ऐरोली सेक्टर- ३ येथील श्रीराम विद्यालयाच्या प्रांगणात जाहीर सभा आयोजित करण्यात आली होती. यावेळी उद्धव ठाकरेंनी उपस्थितांना मार्गदर्शन केले. या प्रचार सभेच्या व्यास पीठावर शिवसेनेचे प्रवक्ते संजय राऊत, माजी गृहनिर्माण मंत्री आमदार जितेंद्र आव्हाड, काँग्रेस नेते मुजफ्फर हुसैन साहेब, आरपीआयचे नेते दीपक निकाळजे, माजी आमदार विद्या चव्हाण त्याचप्रमाणे ठाणे लोकसभा मतदारसंघातील महाविकास आघाडीचे प्रमुख पदाधिकारी, महिला व युवा सेना पदाधिकारी आदी उपस्थित होते. ऐरोली विधानसभा मतदारसंघात प्रथमच उद्धव ठाकरे यांची सभा झाली. या सभेला शिवसैनिकांसह नागरिकांनी मोठ्या प्रमाणावर गर्दी केल्याच्या पहायला मिळाले. विविध पक्षांच्या पदाधिकाऱ्यांनी आणि सामाजिक संघटनेच्या पदाधिकाऱ्यांनी उद्धव ठाकरे यांच्या उपस्थितीत शिवसेना उद्धव बाळासाहेब ठाकरे गटात प्रवेश केला. प्रचार सभेत मोदींचा समाचार घेताना उद्धव ठाकरे यांनी भाजपच्या हिंदुत्वावर टीका करताना आमचे हिंदुत्व हे घरात चूल पेटवणारे आहे आणि भाजपाचे हिंदुत्व हे घर पेटवणारे आहे, अशी टीका केली. 'जो नाही कामाचा तो कसा होईल रामाचा' असं सांगत दहा वर्षात मोदींमुळे रामराजे आले का? असा प्रश्न उद्धव ठाकरे यांनी यावेळी उपस्थित केला. ४०० पारचा नारा देणाऱ्या पंतप्रधान नरेंद्र मोदी यांनी ठाणे लोकसभा मतदारसंघात राजन विचारे यांनी केलेले कामे पाहता त्यांच्या विरोधात निवडणूक लढवून विजयी होऊन दाखवावं, असे आवाहन केले.भाजपाने आतापर्यंत पक्ष फोडले, अनेकांची घरे फोडली आहेत. राजकारणात भाजपला मुलं झाले नाहीत. भाजपने दुसऱ्याची पोरं कडेवर घेतली आहेत. भाजपला मुले होत नाही त्यात माझी काही चूक? अशी मिश्किल टीका उद्धव ठाकरे करताच एकच हशा पिकल्या होत्या. शिवसेना पक्ष फुटीनंतर शिवसेना नाव आणि धनुष्यबाण हे शिंदे गटाला देण्यात आले आहे. उद्धव ठाकरे यांनी यावर टीका करताना शिवसेना हे नाव माझ्या आजोबांनी दिलेला आहे. निवडणूक आयोगाने दिलेले नाही. निवडणूक आयोग हे दबावाखाली काम करत असून निवडणूक आयोगाने आपल्यावरही निवडणूक आयुक्त हे विकले गेल्याचा आरोप केला.यावेळी राष्ट्रवादी काँग्रेसचे नेते जितेंद्र आव्हाड यांनी देखील भाजप सरकारवर टीका करताना हे सरकार संविधान बदलण्यासाठी प्रयत्न करत असून ४०० पारचा नारा देत आहे. विकासाच्या मुद्द्यावर बोलण्या ऐवजी जातीबद्दल बोलत आहे. मोदी सरकार हे ८० कोटी लोकांना जेवण देत असल्याचे बोलत असून त्यांना रोजगार देण्यापेक्षा लाचार करत असल्याची टीका आव्हाड यांनी केली. या देशाची आर्थिक घडी यांनी विस्कटवली असून त्यांनी त्यांनी ईव्हीएममध्ये घोटाळा केला आहे, असा देखील आरोप आव्हाड यांनी केला आहे. शिवसेना उद्धव बाळासाहेब ठाकरे गटाचे प्रवक्ते संजय राऊत यांनी मोदींवर टीका करताना मोदींनी देशसेवेच्या नावाखाली देश लुटला आहे. आता त्यांना हिमालय दाखवण्याची वेळ आली आहे. तुम्ही धनुष्यबाण चोरला असून तो गद्दराच्या हाती दिला आहे. त्यामुळे राजकीय पटलावरून कमळ जनता नष्ट करेल, अशी टीका राऊत यांनी केली.ठाणे लोकसभा मतदारसंघात केलेली विकास कामे माझ्या पाच वर्षाच्या कारकीर्दीची आणि केलेल्या कामाचे पोचपावती आहे. या शिंदे भाजपा सरकारला विमानतळाला दि.बा. पाटलांचे नाव देता आले नाही. आम्ही सत्तेवर आल्यानंतर विमानतळाला दि बाचे नाव देऊ, असं आश्वासन देत राजन विचारे यांनी विरोधकांना चारी मुंड्या चीत करून मशालीला मतदान करण्याचे आव्हान केले. उद्धव ठाकरे यांनी राजाने विचारे यांनी केलेल्या विकास पुस्तिकेचे प्रकाशन करत इतकी विकास कामे मोदींनी केली आहे का? ते दाखवा असे आवाहन विरोधकांना केले.

from Marathi News: मराठी बातम्या, Latest News in Marathi, Breaking Marathi News, Marathi News Paper | Maharashtra Times https://ift.tt/dvzU4OE