मुंबई : संयुक्त राष्ट्राच्या महासभेत कदाचित यापूर्वी कधीही घडलं नव्हतं असं पहिल्यांदाच घडलं. जेव्हा भाषणासाठी पुढे आले, तेव्हा अक्षरशः पूर्ण सभागृह रिकामं झालं. अनेक देशांनी त्यांच्या भाषणावर बहिष्कार टाकला. पण त्यानंतर सुद्धा मोठ्या हिंमतीने नेत्यान्याहू यांनी जे भाषण केलं, त्याने सगळ्यांचे वाभाडे काढलेत. आपल्या समोर सगळ्या देशांचे प्रतिनिधी बहिष्कार टाकून निघून जातात हे पाहून एखादा पंतप्रधान नैराश्यात गेला असता, किंवा भाषण करणं टाळलं असतं, पण नेत्यान्याहू ज्या तयारीने आले होते त्याची कल्पना कुणीही केली नव्हती. या बहिष्कार टाकणाऱ्या देशांमध्ये फक्त अरब देशच नव्हते, तर अनेक युरोपियन देशही होते. या युरोपियन देशांनीही इस्रायलच्या संबोधनावर बहिष्कार टाकला.
भारताने काय केलं?
भारताचं बोलायचं तर भारताने बहिष्कार टाकला नव्हता. नेत्यान्याहूंच्या भाषणावेळी भारताचे प्रतिनिधी पूर्णवेळ सभागृहात बसून होते. पंतप्रधान मोदी सुद्धा यूएनच्या संबोधनासाठी अमेरिकेला गेले होते, त्यांचा दौरा आटोपून ते माघारी परतले, मात्र एस जयशंकर अजूनही अमेरिकेत आहेत. भारताचे संयुक्त राष्ट्राचे प्रतिनिधीही या भाषणाला उपस्थित होते. नेत्यान्याहू यांचं पूर्ण भाषण न दाखवता मी तुम्हाला त्यांचे फक्त दोन ते तीन मुद्दे सांगणार आहे, ज्यातून त्यांनी संयुक्त राष्ट्रासह बहिष्कार टाकणाऱ्या देशांनाही अक्षरशः धुतलंय. मध्य पूर्वेत सध्या जो संघर्ष सुरू आहे, इस्रायल सैन्य लेबनॉनच्या सीमेवर दाखल झालं, त्याचदरम्यान नेत्यान्याहू यांचं हे रुप जगाला आणखी भीती घालणारं का आहे? संयुक्त राष्ट्रात जे घडलं त्याची पार्श्वभूमीही तशीच आहे. इस्रायलने अमेरिकेचा युद्धविरामाचा प्रस्ताव फेटाळला आणि जोपर्यंत हमास शस्त्र टाकत नाही तोपर्यंत आम्ही लढतच राहू, असं नेत्यान्याहू यांनी जाहिर केलं. त्यासोबतच इस्रायलचे रणगाडे मोठ्या प्रमाणात लेबनॉनच्या सीमेवरही दाखल झाले. लेबनॉनमध्ये कोणत्याही क्षणी इस्रायलचं सैन्य घुसू शकतं. हिजबुल्लाचा पूर्णपणे काटा काढल्याशिवाय आता माघार नाही, हे सुद्धा इस्रायलने जाहिर केलं. एखाद्या देशात आपलं सैन्य घुसवण्याची किंमत किती मोजावी लागते ते अमेरिकेचं अफगाणिस्तानमधलं उदाहरण पाहिलं तर लक्षात येईल. अमेरिकेलाही अफगाणिस्तानमधून तालिबानचा खात्मा करायचा होता, पण तालिबानने सामान्य नागरिकांना आश्रय बनवलं, लोकांच्या मागे ते लपले आणि अमेरिकेला तालिबान संपवणं शक्य झालं नाही. अमेरिकेतील नाईन इलेव्हन अटॅकनंतर अमेरिकन सैन्य २००१ ला अफगाणिस्तानमध्ये घुसलं. पुढचे २० वर्ष अमेरिकेचं सैन्य अफगाणिस्तानमध्ये राहिलं, या काळात अमेरिकेचे हजारो सैनिक मारले गेले, कित्येक बिलियन डॉलर्स अमेरिकेने खर्च केले, पण शेवटी अमेरिकन सैन्य २० वर्षानंतर मागे घ्यावं लागलं. हे सैन्य मागे घेताच पुन्हा एकदा तालिबानने सत्ता ताब्यात घेतली. इस्रायलने जर लेबनॉनमध्ये घुसण्याची चूक केली तर अफगाणिस्तानमध्ये अमेरिकेने जी चूक केली त्याचीच पुनरावृत्ती होऊ शकते असं तज्ञांचं मत आहे. कारण हिजबुल्ला आत्तापासूनच लोकांच्या मागे लपून हल्ले करत आहे. ही चूक टाळायची असेल तर इस्रायलकडून एकतर लोकांचीही कत्तल केली जाईल. गाझा पट्टीत आतापर्यंत ४० हजार जणांचा मृत्यू झाल्याची माहिती समोर येत आहे. हाच आकडा जर लेबनॉनमध्ये ऑल आऊट वॉर सुरु झालं तर एक लाखाच्या वर जाऊ शकतो. एकीकडे हमास आणि दुसरीकडे हिजबुल्ला असं टू फ्रंट वॉर सुरु करण्याच्या तयारीत सध्या इस्रायल आहे. याचाच निषेध म्हणून जगातील बहुतांश देशांनी नेत्यान्याहू यांच्या भाषणावर बहिष्कार टाकण्याची भूमिका घेतली. हमासनेही नेत्यान्याहू यांच्या भाषणावर बहिष्कार टाकावा असं आवाहन जगभरातील नेत्यांना केलं होतं. यानंतर संयुक्त राष्ट्राच्या सभेने एक असा अनुभव घेतला जो आतापर्यंत कुणालाही आला नसावा. नेत्यान्याहू यांनी या बहिष्कारानंतर भाषणाला सुरुवात केली आणि पहिल्यांदाच स्पष्ट केलं, की मला इथे यायचं नव्हतं, पण आमच्याविरोधात जो नरेटिव्ह पसरवला जातोय तो खोडून काढण्यासाठी मी इथे आलो. माझा देश सध्या युद्ध लढतोय. आम्ही असंख्य निरागस लोकांचा जीव जाताना डोळ्यासमोर पाहिला आहे. एवढं सांगूनच नेत्यान्याहू थांबले नाहीत, यानंतर त्यांनी जे केलं त्याने अनेकांना धक्काच बसला. नेत्यान्याहू यांच्या हातात दोन नकाशे आहेत. हे समजून सांगण्याआधी नेत्यान्याहू काय म्हणाले, की हा नकाशा आहे जो मी मागच्या वेळी दाखवला होता, हे वरदान आहे. यात इस्रायल आणि अरब देश दिसतील. हिंद महासागरातून युरोपला जोडलं जातंय, आम्ही रेल्वे लाईन, फायबर ऑप्टिक केबल अशा पायाभूत सुविधा उभारतोय. याचा जगातील दोनशे कोटी लोकांना फायदा होणार आहे. हा दुसरा नकाशा पाहा. हा एक शाप आहे. इराणने तयार केलेल्या दहशतवादाचा हा नकाशा आहे. इराणने राष्ट्रीय जलमार्ग बंद केलेत. नेत्यान्याहू यांनी एक नकाशा तर दाखवला आशिया युरोप इकॉनॉमिक कॉरिडोरचा. हा कॉरिडोर आशिया, मध्य पूर्वेतील युरोपला जोडला जातोय. याचं काम सध्या सुरु आहे. वरदान असलेल्या देशांमध्ये नेत्यान्याहू यांनी सौदी अरेबिया, इजिप्त यांसह भारताचं सुद्धा नाव घेतलं. पण दुसरा नकाशा जो दाखवला त्यात इराण, लेबनॉन, यमन हे देश काळ्या सर्कलमध्ये दाखवले गेले. हे देश जगासाठी शाप आहेत, इराणने या देशांमध्ये दहशतवाद पोसलाय, असं नेत्यान्याहू म्हणाले. शेवटी त्यांनी दोन्ही हातात दोन नकाशे घेऊन एकीकडे वरदान आणि दुसरीकडे शाप आहे असं जगासमोर दाखवलं. पण नेत्यान्याहू यांनी दाखवलेल्या एकाही नकाशात पॅलेस्टाईनचं साधं अस्तित्वही दिसत नाही. पॅलेस्टाईनला इस्रायलने जगाच्या नकाशावरुन अक्षरशः गायब केलं.नेत्यान्याहू यांच्या भाषणावर बहिष्कार टाकल्याने अर्थातच इस्रायलच्या मनोधैर्यावर त्याचा कसलाही परिणाम होणार नाही. इस्रायल आर्मीने जी तयारी केली, त्यानुसार पुढचं आक्रमण होणं जवळपास निश्चित आहे. इस्रायलने युद्धविरामाचे सगळे प्रस्ताव फेटाळलेत आणि पूर्ण विजय मिळेपर्यंत हे युद्ध सुरुच राहणार असल्याचं नेत्यान्याहू यांनी थेट संयुक्त राष्ट्राच्या व्यासपीठावरुनच जाहिर केलं. त्यामुळे कुणीही बहिष्कार टाकलाय काय किंवा टीका केली काय, इस्रायल थांबणार नाही हे स्पष्ट आहे. बहिष्कार टाकणाऱ्या देशांना ते हायपोक्राईट म्हणाले आणि आपलं भाषण पूर्ण केलं.from Marathi News: मराठी बातम्या, Latest Marathi Breaking News & Headlines | Maharashtra Times https://ift.tt/GoALQTr
No comments:
Post a Comment